PM Modi-a'n vaccine semchhuak ṭha lo district hotute meeting neihpui

Prime minister Narendra Modi chuan nimin khan ram chhunga Covid-19 vaccine sem chhuah ṭhat lohna district 40-a district magistrate-te chu virtual hmangin review meeting a neihpui.

Nimina meeting-na tel district-te hi vaccine dose khatna 50% la pe chhuak tling lo leh, dose hnihna pe chhuak tlem zualte an ni. Heng district-te hi Jharkhand, Manipur, Nagaland, Arunchal Pradesh, Maharashtra, Meghalaya, Bihar leh state dang amite niin, nimina meeting-ah hian heng state chief minister-te pawh hi an tel a ni.

Prime Minister chuan vaccine la thei chin chu dose khat pek kim an nih thuai theihna tura hma la tura a chah rualin, dose hnihna pawh ang khat renga ngai pawimawh turin a ti bawk. Vaccine chungchanga thu dik tawk lo thehdarh awm ṭhin chu mi tam takin an lak hreh phahna chhana ni thu sawiin, hemi chungchangah hian mipuite zirtirna ṭha pek a ṭul thu a sawi.

Sorkar laipuiin vaccine pek runpui a kalpuiah, in tinah kalin vaccine dose kim la lote chu pek an ni dawn tih a sawi. "A hmain mipuite chu vaccination centre-ah kal a, vaccine la tura tih an ni. Mahse tunah chuan keimahni zawk in tinah kalin vaccine hi kan pe thung dawn a ni," a ti.

Thawhlehni thleng khan ram pumah Covid vaccine dose 1,07,29,66,315 pek chhuah ni tawhin, dose khatna la hi 73,61,08,324 an awm a, dose bikima la tawh mi 33,64,33,302 an awm tawh bawk.

PM Modi hi G20 summit leh COP26 summit hmanga ni nga chhung ram pawna a zinchhuah hnuah nimin zing khan India-ah a rawn kir leh a ni.