State leh UT 22 te'n school hawng leh ṭan Zirtirtu zinga 92% in vaccine la tawh : Sorkar Laipui

India rama state leh Union Territory 22-te chuan hun rei tak Covid-19 hri leng vanga zirna in an khar hnuah zirlai naupang tan school an hawng leh ṭan tawh a, zirtirtu zinga 92% te chuan vaccine dose hnihna an lak tawh thu Union Education Ministry chuan Thawhlehni khan a sawi.

Union education minister Dharmendra Pradhan hoin Thawhlehni vek khan ramchhunga vaccine semchhuah dan thlir chungin school hawn leh educational institution-ah nunphung pangngaia kalpui a nih leh theih dante an thlir ho a ni.

Ministry data tarlan danin, ramchhunga zirtir hna thawk zinga 92% te chuan vaccine an la tawh a, Centre hnuaia institute-a zirtirtu 96% te chuan vaccine an la tawh bawk a ni.

Educational institution-a non-teaching personnel zinga 86% velin dose bikimin an la tawh bawk.

"School-a teaching leh non-teaching hnathawk, institution leh skill centre te leh zirna kaihhnawih leh skilling ecosystem-a vaccine lak tawh dan thlir ho a ni. Ramchhungah chak taka vaccine semchhuah anih avangin school, zirna hmun dang leh skilling institution-ahte hun lo la kal tur thlir chungin nunphung pangngaia kalpui dan turte kan sawiho a ni," tiin Pradhan chuan twitter kaltlangin a sawi.

Rampuma Covid-19 hri leng khuahkhirh a nih theihnan nikum March thla aṭang khan ramchhungah school-te hi khar an ni. State ṭhenkhatte chuan school hawngin class sang lam aṭangin a intahtawlin a kaltir hman a, mahse kumin April thla aṭanga hri leng thawh hnihna nasa tak thleng vang khan khar chhunzawm leh a ni. Tun hnai thla li hnu vel aṭang chauh khan state-te chuan school hi an hawng leh a ni.

State zinga class zawng zawng tana school hawngte chu Delhi, Uttar Pradesh, Haryana, Himachal Pradesh, Maharashtra, Telangana, Karnataka, Tamil Nadu, Kerala, Chhattisgarh, Assam, Arunachal Pradesh, Bihar leh Rajasthan-te an ni.

State leh UT paruk- Jammu and Kashmir, Odisha, Arunachal, Goa, leh Puducherry-te chuan pawl 9-12 inkar tan school an hawng tawh a, State leh UT paruk dang - Ladakh, Gujarat, Punjab, Nagaland leh Jharkhand-te chuan pawl 6 -12 inkar tan school an hawng ṭan leh tawh bawk.

Ministry data tihchhuahah chuan West Bengal leh Manipur-te chiah chu school la hawng ve lo an ni. West Bengal chief minister Mamata Banerjee chuan kar liamta khan November 16 aṭangin pawl 9-12 te chu school an kal tir tawh dawn thu sawiin, Manipur erawh chuan thuthlukna an la siam lo thung.