India rama Covid-19 test kit siam hman theih turin pawmsak

Pune-based molecular diagnostics company Mylab Discovery Solutions Pvt Ltd in Covid-19 test kit a siam chu hman theih turin  Indian FDA/ Central Drugs Standard Control Organisation (CDSCO) chuan a pawmsak ta.

Mylab Discovery Solutions Pvt Ltd hian kar ruk chhungin Mylab PathoDetect COVID-19 Qualitative PCR kit hi siamin, commercial approval hmu hmasa ber a ni. Managing director Has­mukh Rawal chuan India ram chhung ngei aṭanga testing kit siam tuma hma an laknaah tual­chhung mi leh sorkar laipui thlawpna pawh an dawng ṭha tih sawiin, hei vang hian record siamin kar ruk chhungin WHO/CDC guideline ang thlapin Covid-19 test kit hi an siam thei tih a sawi.

Hri leng mek chungchangah India ramah test neihsak an tam tawk loh avangin sawizui pawh a hlawh hle. Mahse testing kit hi ramchhungah siam a nih loh vangin sorkar laipui chuan ramdang aṭanga a lakluh a ngai. Germany aṭangin testing kit hi ṭhahnem tak lakluh a ni a, mahse ram hrang hrangten airport khar a, airline service an tihtawp avangin supply lamah harsatna a awm chho a ni. Mahse India ram chhung ngeia siam pawmsak a nih tak avangin hei hian testing kit indaihlohna kawnga harsatna awmte a phuhruk theih beisei a ni. 

Mylab chuan kar khat chhung­in test kit hi nuai khat siam hman a tiam a, mamawh dan azir­in hei aia tam pawh siam theih a inbeisei tih a sawi. Testing kit an siamah hian kit pakhatah damlo 100 vel zet a test theih dawn tih an sawi. Mylab PathoDetect COVID-19 Qualitative PCR kit hmang hian darkar 2.5 chhungin hri an kai leh kai loh pawh a hriat theih nghal dawn nia sawi a ni bawk. 

Manipur-a nula kum 23 mi chuan Covid-19 a kai tih finfiah a ni, hmarchhak biala hri kai hmuhchhuah hmasa ber a ni. 

Manipur nula hi United Kingdom aṭanga rawn haw a ni a, Uk-ah hian lehkha zirin a awm a ni. Tunah hian Manipur khawpui Imphal-a Jawaharlal Nehru Institute of Medical Sciences (JNIMS) hospital-ah enkawl zui mek a ni. 

Thawhṭanni khan Manipur sorkar chuan March 31 thleng awh turin total lockdown a puang a, Regional Institute of Medical Sciences (RIMS) leh JNIMS-ahte hri kaite dahhranna hmun tur a siam bawk. 

Thawhṭanni khan New Delhi-a Tihar jail thuneitute chuan an jail tang mi 3000 vel chu Covid-19 laka an him theih zawk nan an chhuah dawn tih an sawi.

Jail tang chhuak tur zinga mi 1500-te chu intiamkamna neia chhuah lailawk tir tum a ni a, a dang 1,500-te pawh interim bail a chhuah tir tum an ni bawk. Tang chhuah tur zingah hian criminal case nei serious tak takte erawh a huam lo thung ang.

Financial Year thlak a ni, LS-ah Financial Bill pass 

Reserve Bank of India (RBI) central board ṭhukhawm chuan New Delhi-ah meeting neiin, sorkar kum thar chu July 1-a sawn hlat an rel. Kum 2021-22 financial year chu a pangngai angin nakkum April 1-a ṭan leh tur a ni ang. 

Union finance minister Nirmala Shitharaman chuan Thawhṭanni khan Lok Sabha-ah Financial Bill 2020 chu pu lutin, he bill hi house ah sawi zui loin voice vote hmanga pass nghal a ni bawk. EC-in RS inthlan hun sawn Election Commission of India chuan March 26-a Rajya Sabha seat 55-a inthlan neih tur chu ramchhunga hri leng mek avangin a sawn a, a hun tur tihchian a la ni lo.

 

RS seat 55-a inthlan neih tura seat 37-ah hian candidate pakhat chauh awmin, heng seat-a candidate-te chu chuhtu dang awm loin an tling nghal a, vote thlak ngaihna hi seat 18 chauh a ni. Seat 18-a inthlan neih ngaihnate hi - Gujarat, Andhra Pradesh, Rajasthan, Madhya Pradesh, Jharkhand, Manipur leh Meghalaya te an ni. 

New Delhi-a Shaheen Bagh-a nikum December 15 aṭanga Citizenship Amendment Act 2019 duh lohna lantira ni 100 chuang nawrh huaihawtte chu nimin zing khan police-te chuan an hnawt darh. 

Hri leng avanga Delhi sorkarin Delhi khawpui puma lockdown a puan avangin, nimin zing dar 7 vel khan Delhi police-te chuan Shaheen Bagh-a nawrh huaihawt­te hi hnawh darh tumin hma an la a ni. Mipui awmkhawmte hi an kal darh duh mai loh avangin police-te chuan tihluihna hmangin an hnawt darh a ni. Nawrh huaihawt zinga a huai bak deuh mi pakua-te chu man zui an ni a, man zingah hian mipa pathum leh hmeichhe paruk an awm.

Ministry of Health and Family Welfare Covid-19 record :

Hri kai zat    -    415

Thihpui    -    8

Enkawl dam    -    27