Sorkar laipuiin fuel-a chhiah lak tihniam ; BJP sorkarna state ṭhenkhatin VAT tihniam bawk

Ram chhunga fuel man sang chho zel avanga BJP kaihhruai National Demcoratic Alliance (NDA) sorkarin sawisel leh demna nasa tak a tawh hnuah, nimin aṭang khan sorkar laipui chuan fuel-a excise duty a lak chu a tihniam a, hemi rual hian BJP sorkarna state eng emaw zatin Value Added Tax (VAT) an lak pawh an tihniam zui ve bawk.

Sorkar laipui chuan petrol-a excise duty a lak chu litre khatah Rs 5-a tihniamin, diesel-ah Rs 10 a tihniam bawk. Chhiah lak a tihniam avanga sorkarin kum khatah a sum hloh tur hi cheng vaibelchhe nuai 2.10 vel a tling dawn a ni.

Khawvel huapa oil man a san chhoh avangin nikum khan BJP sorkar hian petrol-a excise duty a lak ṭhin, litre khata Rs 19.98 chu Rs 32.9 ah a tisang a, diesel-a chhiah a lak pawh litre khatah Rs 31.80-ah a tipung bawk. International oil price man a tlakhniam hnuah pawh a chhiah lak hi tihniam tawh loin a hman chhunzawm zel a, hei vang hian ram chhungah fuel man a to chho zel a, Nilaini khan Delhi-ah chuan petrol litre khat Rs 110, Mumbai-ah Rs 115 leh Delhi-a diesel litre khat Rs 98.42 leh Mumbai-ah Rs 106.62-ah an kai chho hman.

Sorkar laipui chuan fuel-a chhiah lak tihniam hi consumer-te chauh ni loin, ram pum economy thlengin a ṭha zawnga a nghawng an beisei thu a sawi. Finance ministry chuan thil man sang chho pawh ziaawm phahin, hei hi mirethei leh middle class-ten an chhawr thei dawn a ni, a ti.

State hrang hrangte pawh petrol leh diesel-a VAT an lak tihniam turin a ngen nghal a, BJP sorkar state eng emaw zat chuan VAT hi an tihniam ve nghal a ni. VAT tihniam zinga state tam ber chuan petrol leh diesel-a chhiah an lak hi Rs 7-in an tihniam a, hetih lai hian Uttar Pradesh sorkar chuan Rs 12 ve vein a tihniam thung.