PM Modi-a'n J&K-a sipaite Diwali hmanpui

Prime minister Narendra Modi chuan kum danga a tih ṭhin dan angin, sipaite bula Diwali hmang turin nimin khan Nowshera, Jammu a thleng. Nowshera sector hi Rajouri district-a Line of Control (LoC) -a awm a ni.

PM Modi hian kum 2014-a office a luah ṭan aṭang khan kumtinin sipaite bulah Diwali lawmna hun hi a hmang ṭhin a ni. PM hian mipuite chu Diwali chibai bukin, he kut hlimawm tak hian hlimna, hlawhtlinna leh vanneihna a thlen a duhsak thu a sawi.

"Ram mipuite Diwali chibai ka buk vek a che u. He kut hian hlimna, hlawhtlinna leh in nunah vanneihna rawn thlen se. Mitinte Diwali hlimawm tak hmang turin duhsakna ka hlan a che u," tiin a twitter-ah mipuite duhsakna a hlan.

Nikum khan Modi chuan Longewala, Jaisalmer Rajasthan-ah sipaite nen Diwali lawmna hun hmangin, India sipaite an awm chhung chu he ram hian theihtawpa hlimin Diwali lawmna hun hi kan hmang zel dawn a ni, tiin a lo sawi tawh a ni.

Kum 2019 khan PM hian Jammu and Kashmir-a Rajouri district-a Line of Control (LoC)-a sipaite bulah Diwali hi a lo lawm tawh bawk. Diwali kut lawmna an hman lai pawha ramri venghim ṭhintu sipaite leh an chhungte chungah lawmthu a sawi nghal a ni.

Kum 2018 khan prime minister Modi hian Harsil, Uttarakhand-a Indian Army leh Indo-Tibetan Border Police (ITBP) te nen Diwali hi an hmang ho a. Kedarnath biakinah ṭawngṭaina hun a hmang zui nghal bawk.

Kum 2017 khan PM hian Diwali lawmna hi Gurez Valley, Jammu and Kashmir-a Bandipora District-ah sipaite leh Border Security Force (BSF) te bulah a lo hmang tawh bawk a ni.

Kum 2016 khan kut hi Himachal Pradesh-a Indo-Tibetan Border Police te nen an hmang ho a, kum 2015 khan Punjab inrinaa sipaite nen Diwali hi an hmang ho bawk.

Kum 2014 khan Prime Minister Modi chuan Siachen-a sipaite chu Diwali a hmanpui a ni. PM Modi hian Diwali-ah sipaite hi a tlawh ṭhin a, Gujarat Chief Minister-a thlan tlin a nih aṭang khan sipaite bulah Diwali hi a hmang ziah a ni.