India ramah Covid-19 kai 12,729 awm belh

India ramah Ningani khan Covid-19 kai thar 12,729 leh thihpui 221 an awm a, hri kai tawh zat hi 3,43,33,754 leh thihpui 4,59,873 an awm tawh tiin Ministry of Health data chuan a tarlang. Ningani vek khan hri kai dama puan mi 12,165 an awm bawk.

Nilaini aiin Ningani khan Covid-19 kai mek hi 343 in an pun belh. Nimin zing thleng khan ramchhungah hri kai mek, active case 1,48,922 an awm a ni.

Ni 28 chhung a zawnin hri kai thar mi 20,000 hnuai lamah a awm tawh a, ni 131 chhung 50,000 hnuailamah a awm tawh bawk

Hri kai tawh zat aṭanga hri kai mek hi 0.43% niin, March 2020 hnua a hniam ber ṭum a ni. Ramchhunga Covid-19 hri kai dama puan, recovery rate hi 98.23% niin, March 2020 hnua a hniam ber ṭum a nih thu ministry chuan a sawi.

Ni khata hri kai hmuh chhuah, daily positivity rate hi 1.90% ni mekin, ni 32 chhung 2% hnuai lamah a awm tawh, weekly positivity rate pawh ni 42 chhung 2% hnuaiah awmin 1.25% a ni mek.

Kerala chu hri kai hmuh chhuah thar tamna ber state la ni zelin, Ningani bikah khan hri kai thar 7,545 an awm belh leh a, mi 136 in an thihpui. Tamil Nadu, Andhra Pradesh leh Karnataka-te chu hri kai hmuh chhuah thar tamna dang an ni.

State leh Union territory-a mi vaibelchhe 116.50 chuang hnenah Covid-19 vaccine dose an semchhuak tawh tih sorkar laipui chuan a sawi.

Vaccine semchhuah tawh aṭangin, state leh Union territory-te tan Covid-19 vaccine la hmanchhuah loh dose vbc 15.54 chuang a awm mek tih ministry of health and family welfare chuan a tarlang bawk.

"Sorkar laipui aṭanga cost channel leh direct state procurement category kaltlangin state leh Union territory(UT)-te tan vaccine dose vbc 116.50 chuang pekchhuah a ni tawh a ni" tiin ministry chuan a sawi.