Punjab CM hluiin political party thar din

Punjab chief minister hlui leh Congress hruaitu hlui, Amarinder Singh chuan Congress party a chhuahsan hnuah political party thar, Punjab Lok Congress a din ta.

Punjab Congress chief Navjot Singh Sidhu nen an inkar boruak a ṭhat loh avangin September thla khan Amarinder Singh hi cheif minister a nihna aṭangin a lo bang tawh a ni. Hemi hnu hian a awm dan tur a sawichiang mai lo a, BJP a zawm dawn nia thuthangte pawh a awm hman a ni. Thawhlehni khan Congress party aṭanga banna chu Sonia Gandhi hnenah thehlutin a banna chhante a sawi bawk. Hemi ni vek hian political party a din thar hming chu a puang nghal bawk. Election Commission of India-ah registration an thehlut tawh a, party symbol pawh an pawmsak thuai a beisei thu a sawi.

Sonia Gandhi hnena lehkha a thehluhah, Singh chuan Sidhu chuan party hruaitu dinhmun a chelh chhoh hnuah amah leh a kaihhruai sorkar chu a hmu mawh chho niin a sawi. State party chhunga buaina an neiha a chunga party hotute thiltih danah a lawm loh thu leh, a tana a zahthlak hle thu pawh a sawi.