BJP Meet-ah PM Modi an chawimawi

Bharatiya Janata Party (BJP) president JP Nadda leh party hruaitu dangte chuan nimina BJP national executive committee meeting neihah, prime minister Narendra Modi chu Covid-19 hri leng vanga ram pum huapa lockdown puang tura thutlukna huaisen tak a siam avangin chawimawina an hlan.

BJP hruaitute chuan hri leng kara ram economy tlahniam siamṭha tura PM hmalaka chu fakawm an tih thu an sawi bawk.

Party national executive meeting hi New Delhi-a NdMC Convention Centre-ah neih a ni a, meeting hi PM Modi leh party president JP Nadda-te an hawng a ni. Kum 2019 Lok Sabha inthlanpui neih hnuah BJP national executive meeting an neih lehna hmasa ber a ni.

Nimina meeting ṭan niah hian BJP senior leader 124 telin, BJP sorkarna state-a chief minister leh deputy chief minister, BJP state unit president leh senior leader dangte chu virtual hmangin an tel bawk. Nakkuma assembly inthlan neihna tur state pasarih - Goa, Manipur, Punjab, Uttar Pradesh, Uttarakhand, Himachal Pradesh leh Gujarat-a party hmalak dan turte an sawiho bawk. Heng state pasarih zingah hian Punjab tih loh chu BJP sorkar mekna te an ni.

Meeting neihna hmunah hian PM Modi kaihhruai sorkar policy leh programme hrang hrangte tarlanna exhibition buatsaih tel a ni bawk a ni.