Maharashtra damdawi-ina kangmei chhuakah Covid-19 kai damlo enkawl lai 11 an thi

Maharashtra-a Ahmednagar district damdawi-ina kar liam ta Inrinni-a ICU kangmei chhuak vangin mi 11 an thi.

Kangmei chhuahna hmun hi Covid-19 hri kai dam lo ngaihtuahawm zualte dahna niin, he thil thlen lai hian ICU ward-ah hian dam lo 17 an awm. A tam zawk chu kum upa tawh, ventilor leh oxygen hmanga enkawlte an ni. He ward hi Covid-19 hri len hnuah, hri kaite enkawlna tura an siam belh a ni.

Police-te chuan he chhiatna thleng chungchang an chhuinaah, dam lo ṭhenkhat chu an kang hlum a, hetih lai hian ṭhenkhat erawh chu meikhu an hip luh nasat avanga thi an ni tih an sawi. Thil thleng dan chipchiar zawk an chhui mek thu a sawi.

Damdawiina kangmei chhuak vang hian Inrinni tlai khan Indian Penal Code Section 304 (A) (causing death by negligence) hnuaiah thubuai ziahluh nghal a nih thu Ahmednagar district Superintendent of Police Manoj Patil chuan a sawi. Kangmei chhuah chhan hi short circuit vang nia rinhlelh a ni a, hei hi enfiah mek a nih thu chief fire officer Shankar Misal chuan a sawi bawk.

Kangmei chhuak vanga thite hi kum 65-83 inkar an ni a, chief minister Uddhav Thackeray chuan district collector kaihhruaina hnuaiah he chhiatna thlen dan hi chhui chian a nih tur thu a sawi. Maharastra energy minister Nitin Raut thupek angin electricity department pawhin damdawi-in hi tlawhin, thil thlen dan hi an enfiah bawk a ni.

Kumin April thla khan Maharashtra-a Palghar district-ah private hospital-a ICU a kan vangin Covid-19 hri kai enkawl lai mi 15 an lo thi tawh bawk. March thla khan Mumbai-a Bhahdup area-a Drams Mall a kang bawk a, he hmunah hian Covid-designated hospital awmin dam lo pakua an thi tawh bawk a ni.