SCO summit hmangin PM a zin

Prime Minister Narendra Modi chu ni hnih cham turin kar kalta Inrinni khan Qindao, China-ah a zin.

PM Modi hi ram pariat telna, Shanghai Cooperation Organisation SCO summit vawi 18-naah a tel nghal a ni. SCO member-ah hian India bakah China, Russia, Kazakhstan, Kyrgyzstan, Tajikistan leh Uzbekistan te an tel. SCO member puitlinga India pawm a nih hnua summit an neihna hmasa ber a ni.

Modi leh China President Xi Jinping-te chu SCO summit kar lakah an inkawm bawk. Modi leh Xi-te hian ram pahnihte inlaichinna bakah insumdawn tawnna tihchangtlun dan tur an sawidun. Hei bakah hian ram pahnih thawh dun theihna tur, Afghanistan-a capacity building project kalpui chungchang pawh an sawidun bawk.

Nimin SCO summit Plenary session-ah Modi chuan thu sawiin, SCO member ramte chuan ramdangte thuneihna an zahsak a pawimawh thu a sawi a, hei bakah hian member ramte chuan economy lama hma an sawn te, inkalpawhna ṭha leh inpumkhatna nghet tak a neih a pawimawh thu a sawi. Inkalpawhna ṭha chu leilung lama inzawmna siamtu chauh ni loin, ram mipuite inpawhna a siam a ni, a ti. Inkalpawhna ṭha chu economy lama hmasawnna tura thil pawimawh tak a nih thu a sawi bawk a ni.

Firfiaka chetna thleng ṭhin a dem thu sawiin, Modi chuan Aghanistan ram vanduaithlak takin firfiakten nghawng ṭha lo tak an neih ṭhin lanchhuahna ram a nih thu a sawi. Hemi rual hian Afghanistan President Ghani-an muanna a awm theihna tura a hmalakna te chu ramdang te pawhin an zahsak a, a hlawhtlin ngei a beisei thu a sawi.

China President Xi pawhin nimina SCO Plenary session-ah hian thu a sawi bawk a, China chuan SCO joint project kalpuina turin yuan tluklehdingawn 30 ( dollar tld 4.7) loan a pek tur thu a sawi bawk.