Ruahsur nasain Mumbai nunphung tikhaihlak

Kar kalta kartawp lama ruah sur nasain Mumbai mipuite khawsak phung a tikhaihlak hle.

Ruah sur vangin khawpui chhung hmun hniam laite chu tuiin a chim nasa hle a, hei vang hian khawpui chhunga rel tlan leh thlawhtheihna service pawh a khaihlak phah a ni. Ramchhunga thlawhtheihna service 20 chuang zet chu tikhawtlai a nih bakah cancel an ni a, ram pawn lama thlawk chhuak tur thlawhtheihna 12 pawh an chhuah hun tihtlai a ngaih phah bawk.

Delhi khawpuiah pawh Inrinni khan ruah 4.5mm a sur a, hei vang hian tlai 5–6 in inkar khan thlawhtheihna 27 zet chu an kawng tihdanglam sak an ni. Punjab, Haryana, Rajasthan leh Himachal Pradesh-ah pawh ruah a sur nasa hle a, hmun ṭhenkhatah chuan thlipui tleh telin thingkungte len thluin inchungte a la bawk.

Thlipui tleh leh ṭek tlak vangin Uttar Pradesh-ah mi 26 an thi a, Mumbai-ah mi pahnih leh Kreala-ah mi pathum an thi tawh bawk a ni.

Met Department chuan sangha mantute chu tuipui lama chhuak rih lo turin an hriattir a, khualzinte pawh tuipui kam te hnaih lo turin an ti bawk. Mumbai police-te pawhin mipuite chu ruahsur hnuaia an tlanchhuah pawhin fimkhur turin a chah a ni. Khawchin zirtute chuan Konkan bial, Mumbai khawpui huam telin nimin leh vawiin-ah ruah a la sur chhunzawm leh dawn niin an sawi.