Bihar sorkarin khaini khap a tum

Bihar Chief Minister Nitish Kumar-a kaihhruai sorkar chuan Bihar-a zu zawrh leh in a khap hnuhah, 'khaini' (unprocessed tobacco) khap a tum leh.

Bihar sorkar chaun Union Health Ministry hnenah khaini khap a nih theihna tura inrawlh turin ziakin a ngen tawh a ni. State principal secretary (health) Sanjay Kumar chuan khaini hian natna tam tak a thlen niin a sawi.

Kumar chuan, "Pan masala leh gutkha chu state-ah khap ni tawh a, khaini hi a hluar hle tih kan hria a, khap leh kan tum a ni" a ti. Union Health Ministry hnenah Food Safety and Standards Authority of India (FSSAI) chu khaini hi food products list-a telh tura hriattir tura an ngen thu a sawi. FSSAI guideline-ah chuan food products zingah vaihlo leh nicotine awm chu khap vek tura tih a ni a, khaini pawh hi food products-a telh anih chuan khap theih a ni dawn a ni, a ti.

Bihar state-ah chuan kum 10 kalta chhungin vaihlo hmangtu hi an tlahniam hle a, mahse khaini ngawl vei tlakhniamna erawh a tlem hle niin a sawi. Hei vang hian khaini khap a nih theih nana sorkar a inrawlh a ngai a ni, tiin Kumar chuan a sawi.

Hetih lai hian state sorkarin khaini khap a tum hi eptu lam chuan an sawisel a, khap anih chuan vaihlo lama sumdawnna aṭanga eizawng mi tam tak a nghawng dawn a ni, an ti. Hindustani Awam Morcha (HAM) thupuangtu Danish Rizwan chuan he thil hi CM Nitish Kumar-an a hnathawh ṭhat loh thup a tumna hmanrua mai niin a sawi.