UK-ah Nirav Modi a tlanchhia

Punjab National Bank (PNB)-a sum tam tham tak tihchingpennaa mawhphurtua puh, lunghlua sumdawng lian Nirav Modi chu chin hriat loha hun eng emaw chen a bibo hnuah United Kingdom (UK)-ah tlanchhiain, political asylum a dil nia sawi a ni.

Nirav Modi leh a pu, Mehul Choksi-te chu PNB-a inbumna thleng chungchangah Enforcement Directorate chuan an chhui mek a ni. ED bakah central agency dang pawhin cheng vabelchhe 13,000 chuanga nationalised bank buma puh chungchangah an chhui bawk a ni. Dik lo taka thiltihnaah hian bank-a thawk ṭhenkhat pawh an inhnamhnawih nia puh a ni.

Modi leh Choksi-te hian PNB-a inbumna thleng chungchangah thubuai siamsak an nih hmain India ram an chhuahsan hman a ni.

CBI chuan May thla khan Mumbai court-ah Modi lakah hian chargesheet pahnih a lo thehlut tawh a, ED pawhin Nirav Modi leh a thurualpuite lakah chargesheet a thehlut bawk. Thubuai siamsak zingah hian PNB hotu hlui Usha Ananthasubramanian, bank executive director pahnih leh Nirav Modi-a company pathum pawh an tel.

Ministry of external affairs chuan Modi-a chungchangah hian UK law enforcement agency-te thu an la ngaichang mek tih a sawi a, India rama thawn kir tura ngenna an la siam loh thu an sawi.