PM hian harsatna siam loin mipuite venghim zawk rawh se - Kejriwal

Delhi Chief Minister Arvind Kejriwal-a chuan Prime Minister Narendra Modi chu politics ṭha taka khel mai tur leh, mipuite tana harsatna thleng zawnga thil ti lo turin a ti.

Kejriwal-a chuan, "CBI chuan kan official-te koin an tinawmnah thei hle a ni. Thu zawtfiah turin an ko a, darkar rei tak tak an ṭhuttir ṭhin a ni", a ti. BJP leh Lt Governor te chuan Central Bureau of Investigation leh Anti-Corruption Branch (ACB) te chu Aam Aadmi Party (AAP) beihna atan an hmang ṭhin niin a puh bawk. CBI chuan BJP President Amit Shah leh PM Modi-te hnenah report an pe ṭhin niin a sawi.

Delhi CM chuan ACB leh CBI te hian thubuai 14 an siamsak tawh nia sawiin, a in leh a minister te inte pawh an dapsak tawh tih a sawi. Mahse dik taka hna an thawk tih an hriat avangin CBI te pawh hian an man thei lo niin a sawi. Hetianga an chet chhan chu BJP in tihhmingchhiat an tum vang a ni, a ti.

"Prime Minister hi ram tan pa a ni a, harsatna siam loin mipuite venhim hna a thawk zawk tur a ni. Delhi-ah Mohalla clinic 1,000 hawn kan tum a nih chuan, rampumah 10,000 a hawng ve thei tur a ni. Mipuite pawh a chungah an lawmin an fak zawk dawn a ni", tiin Kerjiwal chuan a sawi.