Chennai ruahsur nasa vangin mi 5 thi tawh ; November 11 thleng mipuite fimkhur turin chah

Tamil Nadu state-a ruahsur nasa tak avanga chhiatna thlengah mi panga an thi tawh. Hetih lai hian India Meteorological Department (IMD) chuan ruah hi a la sur chhunzawm zel dawn nia sawiin, November 11 thleng mipuite chu fimkhur turin a chah.

State revenue and disaster management minister KKSSR Ramachandran chuan ruahsur vang hian buk 538 leh in pali a chhe tawh tih sawiin, ruah a sur chhunzawm zel chuan chhiatna nasa zawk a la thleng thei ngei dawn tih a sawi.

IMD chuan Bay of Bengal-a low pressure area insiam vangin tunkar Ningani thleng ruah ala tlak chhunzawm dawn tih a sawi. November 11 aṭangin ziaawm ṭanin, hmarthlang lamah a thawh chhunzawm leh rin a ni. Ruah a sur chhunzawm zel dawn avangin tuiin kawngpui a chim, hmun hniam lama chengte awmnaa tui inhnawhkhawm, traffic lama buaina, building chhia, leitawlh/leitla-te a la thlen theih bakah, thlai chinte pawh an chhiat a hlauhthawnawm thu a sawi.

Ruah sur vang hian state sorkar chuan district 23-a school leh college-te chu nimin thleng khan a khar tir a ni.