Ni 4 cham turin Nepal Army Chief a rawn zin

Nepal Army chief Gen Prabhu Ram Sharma chu defence lama India leh Nepal thawhdunna ṭha leh zau zawk siam dan ngaihtuahin ni li cham turin nimin khan India-ah a rawn zin.

Indian Army chief Gen Manoj Mukund Naravane sawmna anga zin, Gen Sharma hi New Delhi-ah India president Ram Nath Kovind chuan honorary title, 'General of Indian Army' a hlan dawn tih Nepal Army thuchhuah chuan a tarlang.

India leh Nepal sipaite hian tihdan phung danglam tak, sipai hotu lu ber hnenah Hononary General title inhlan hi kum 1950 aṭang khan an lo kalpui ṭan a, hei hi ram pahnih sipaite thawhdunna ṭhatzia lantirna atana tih a ni. Kum 2020 November 5 khan Nepal president Bidya Devi Bhandari chuan an ram tlawhtu, Indian Army chief Gen MM Naravane chu General of Nepali Army title a lo hlan tawh bawk a ni.

Gen Sharma hi a nupui, Nepali Army Wives Assocation chairperson Sunita Sharma chuan a rawn ṭawiawm a ni. A cham chhungin defence secretary Ajay Kumar, chief of defence staff General Bipin Rawat, Army chief Naravane leh Air chief marshal V R Chaudhary-te meeting a neihpui ang.