Kejriwal leh a minister-ten nawrh chhunzawm

Delhi Chief Minister Arvind Kejriwal leh a cabinet minister-te chuan Thawhlehni zan khan Lieutenant-Governor Anil Baijal-a office-ah nawrh an huaihawt chhunzawm a, mahse nimin thleng khan inremna an la siam lo.

Kerjiwal-a leh a minister-te hian waiting room-a ṭhutthlengah zan hnih hun an hmang tawh a ni.

Nimin zing khan CM chuan a twitter-ah Delhi khawpui hmasawnna daltu tihtawp tumin an bei chhunzawm zel dawn tih a sawi. Deputy CM Manish Sisodia pawhin an nawrh huaihawt chu a ni thumna a ni tawh a, hetichung hian LG chuan IAS officer nuarte tihtawp tumin hma a la duh lo niin a sawi bawk.

Thawhṭanni khan Kejriwal leh a deputy Sisodia bakah AAP minister Satyendar Jain leh Gopal Rain-te chu IAS officer-te nawrh huaihawt chungchangah Raj Niwas-ah LG Baijal hmu turin an kal a ni. Mahse an meeting hian rah ṭha engmah a chhuah loh vangin CM team hi waiting room-ah nawrh huaihawtin an awm zui a ni.

Kejriwal-a chuan, 'Kum khat zet ka ngawi tawh a, hei hi sorkar laipui chuan remchangah lo lak a tum zel a ni", a ti. Kejriwal hian IAS officer-te chu an nawrh titawp tura nawr turin LG hi a ngen a, officer hna thawk duh lote chu hremna pe tur leh, a kaihhruai sorkarin ration delivery scheme a siamte pawmsak turin a ngen bawk.

CM chuan kumin February thlaa Chief Secretary Anshu Prakash-a kut thlak nia sawi a nih hnuah khan, Delhi-a IAS officer-te chuan minister-te meeting an telpui duh loh bakah, telephone-a an biakna pawh an chhang duh loh niin a sawi. Hetianga IAS officer-te nawrh huaihawt hian sorkar hmalakna hrang hrang a nghawng buai hle niin a sawi a, bikin mohalla clinic dinna tur te, drain siamna tur leh private school-te hnena fund pekchhuak tur thlengin a nghawng buai a ni, a ti. IAS officer-te chuan sorkarin an nuar nia a puh chu thu dik lo niin an sawi a, mahse officer-te chuan CM leh minister-te meeting kohah an tel lo tih erawh an pha lo tih an sawi. Sorkar leh IAS officer-te inepnaah hian LG Baijal chuan IAS officer-te lam hi a ṭang a, an hna pawh dan pangngai angin an thawk reng a, Kejriwal leh a minister-te chuan officer-te nena an inkar boruak chu an siamṭhat a ngai a ni, a ti.