Dalit tih ṭawngkam chungchang PCI kutah dah

Ministry of information and broadcasting official-te chuan media miten 'Dalit' tih ṭawngkam an hman theih leh theih loh chungchang chu Press Council of India (PCI) in a ngaihtuah dawn tih a sawi.

Bombay High Court chuan kar hmasa khan ministry hnenah hian media-ten 'Dalit' tih ṭawngkam an hman ṭhin titawp tura hriattirna tichhuak turin a ti a ni. Mahse ministry chuan hemi chungchangah thuneitu chu PCI a nih thu a sawi.

High Court Nagpur bench chuan sorkar document leh inbiaknaa Dalit tih hmante paih vek tura ngenna, petition thehluh chu a ngaihtuah a ni. March 15 khan ministry of social justice and empowerment chuan minister leh department hrang hrang bakah state sokar-te hnenah official communication-a 'Dalit' tih hman ṭhin chu hmang tawh lo turin thurawn a pe a, hemi aiah hian constitutional term 'Scheduled Caste' tih hmang zawk turin a ti a ni.

Hetih lai hian Jawaharlal Nehru University-a Prof Vivek Kumar chuan constitutional term hi chu official thilah chauh hman tura tih nise a duh thu leh, mipui nawlpuiin Dalit tih an hman chu khap ngawt theih a nih loh thu a sawi. Prof Kumar chuan, "Dalit tih hi anmahni Dalit hnam ngeiten an thlan a ni. Hei vang hian Dalit tih hman pawh hi an chhuang hle a ni", a ti.