Ram 96-in India Covid vaccination certificate an pawm : Health Minister

Union health minister Mansukh Mandaviya chuan ram dang 96-te chuan India sorkarin Covid vaccine dose bikima la tawhte hnena chhinchhiahna, Covid vaccination certificate a pekchhuah chu an pawmpui tih a sawi.

Covid vaccination certificate neite hi rampawna an zinchhuahin ngaihhnathiamna sang tak pek an ni tiin Health Minister chuan Thawhlehni khan a sawi. "India rama vaccine siamchhuah leh pekchhuah dan thlirletin khawvel huap pawhin hriatpui kan ni, ram 96 te chuan vaccination certificate an pawm tawh a ni," a ti.

"Ram 96 te hian WHO leh an ramin vaccine an pawmte bakah Covishield dose kima late hnena certificate pekchhuah chu an pawm a ni," tiin a sawi.

Health Minister hian sorkar laipui chuan Covid vaccine hi an pawm ve theihna turin a la pawm lo ram dangte pawh a dawr zel tih sawiin, hei hian zirna, sumdawnna leh thil dang vanga zin chhuak turten harsatna an tawh ṭhin pawh nasa takin a chhawk zangkhai thei dawn a ni, a ti.

UK sorkar chuan Thawhṭannia travel guideline thar ber an tihchhuahah, Bharat Biotech siam Covaxin chu November 22 aṭangin a pawm tel dawn tih a lo sawi tawh bawk. "November 22 zing dar li aṭang chuan UK sorkar chuan World Health Organization Emergency Use Listing hnuaia vaccine te chu kan pawm vek tawh dawn a ni" tiin UK sorkar travel guideline chuan a tarlang. He thupek hi kar hmasaa WHO-in emergency use listing-a Covaxin a pawmpui hnuah a siam a ni.

Mandaviya chuan World Health Organisation-in Covid-19 Emergency Use Listing (EUL) vaccine pawmpuina a pek pariat zinga pahnih, Covaxin leh Covishield te chu India rama siam an nih thu a sawi.

Ramchhungah hian vaccine sem chhuah hna hi ngawrh taka kalpui chhunzawm zel a ni a, vaccine dose vaibelchhe 109.08 semchhuah tawh a ni. October 21 khan vaccine vaibelchhe 100 a semchhuak a ni.