Oil man a tihsanna aṭanga a sum hmuhte Sorkar laipuiin state tinte sem rawh se : Mamata Banerjee

West Bengal chief minister Mamata Banerjee chuan sorkar laipuiin tun hnaivaia oil man a tihsanna aṭanga a sum hmuh chu cheng vaibelchhe nuai li vel a ni tih sawiin, heng sumte hi state tinte rualkhai takin sem vek rawh se, a ti.

State assembly session neih meka thu a sawiah, CM Banerjee chuan sorkar laipui hian state pangaa Assembly inthlan awm tur thlirlawk chungin petrol leh diesel-a chhiah a lak, excise duty a tihniam a ni, tiin a sawi.

"Sorkar laipui hian eirawngbawlna gas, petrol leh diesel-a chhiah a lak aṭangin Rs vbc nuai li vel a lakhawm thei a. Tunah chuan BJP te hian VAT tihniam turin state-te an ngen leh thung si. Khawi aṭangin nge state te hian pawisa an hmuh let ang? Sorkar laipui hian a sum lakkhawm, Rs vbc nuai li te hi intluktlang takin state tinte hnenah a semchhuak tur a ni," a ti.

CM hian an state chuan sum lama harsatna an tawh mek karah pawh a kaihhruai sorkar subsidy ṭhahnem tak an la pechhuak reng tih a sawi nghal bawk.

"Inthlan a hnaih apiangin, centre hian thil man a tihniam ṭhin a ni. Inthlan a zawh hnuah an tisang leh mai ṭhin bawk. Oil man chungchanga zirtirna min petute hian state sorkarin khawi aṭangin nge pawisa an hmuh ang tih min chhang hmasa phawt se. Sorkar laipui hian kan pawisa dawn tur te hi min pe rawh se," tiin oil-a VAT an tihhniam loh chuan lungawi lohna lantir tuma vautu BJP chu a vau let a ni.

Banerjee hian sorkar laipui chu vaccine semchhuah kawngah state dangte aiin Bengal chu ngaihsak tawk loah a puh bawk. "State dang Uttar Pradesh te ngaihtuahin vaccine hi min pechhuak tlem bik hle a ni. Vaccine dose khat pawh khawhral lo turin hma kan la a ni," a ti.