Loneituten nitin tractor-in Parliament pana kawngzawh tum

Sorkar laipuiin farm law a siam duh lohna lantira nawrh huaihawt mek, loneitute chuan an thil phut tihhlawhtling tura sorkar nawr nan November 29 aṭangin loneitu 500 zelin nitin tractor hmangin Parliament building thleng kawng an zawh ṭhin dawn tih an sawi.

Loneitu pawl 40 intelkhawmna, Samyukta Kisan Morcha (SKM) chuan state hrang hrang aṭanga kalkhawm loneituten Delhi border-a nawrh an huaihawt ṭan kum khat tlinna, November 26-ah hian state tin khawpuiah pungkhawmna lian tham buatsaih turin a chah bawk. Hemi ni hian Punjab, Haryana, Uttar Pradesh, Uttarakhand leh Rajasthan aṭanga loneitu tam tak chuan Delhi border hi an pankhawm leh dawn tih a sawi bawk.

Parliament winter session neih ṭan ni, November 29 aṭangin loneitu 500 zel chuan tractor nen Parliament panin kawng an zawh ziah dawn a, session neih chhungin nitin tractor rally hi an nei dawn tih SKM chuan an sawi. Buaina chawh chhuah an tum lo a, boruak muanawm tak hnuaiah kawngzawh hi an huaihawt tur thu an sawi a ni. Parliament winter session hi November 29 aṭanga December 23 thleng neih a ni ang.

He thil farm law sut vek tura kum khat chhung loneituten an lo phut tawhna tihhlawhtling tura BJP sorkar nawrna atana ti tur an nih thu an sawi. Kumin March thla khan Parliament panin loneitute hian kawng an lo zawh tawh bawk.