Union Cabinet-in MPLADS kalpui ṭan leh remti

Union Cabinet chuan Nilainia meeting an neihah, Member of Parliament Local Area Development Scheme (MPLADS) chu kalpui ṭan leh tawh turin an rel. MP-te hian kum 2021-22 inkara an dawn tur hmabak cheng vaibelchhe hnih chu hmasawnna hna thawhna atan an dawng dawn a, hemi hnu lamah hian kumtin an dawn ṭhin pangngai cheng vaibelchhe nga an dawng tawh ang.

MPLAD Scheme hi ramchhunga hripui leng vangin nikum April thla aṭang khan tihtawp a ni a, he scheme atana MP-te sum dawn tur chu Consolidated Fund of India-ah chhunluh a ni.

Cabinet thutlukna hi press conference-ah information and broadcasting minister Anurag Thakur chuan sawiin, prime minister Narendra Modi kaihhruaina hnuaiah Union Cabinet chuan he scheme hi financial year 2021-22 chhunga kalpui leh turin a rel a ni. He scheme hi 2025-26 thlenga kalpui tura tih a ni.

MP tinte hnenah 2021-22 atana an dawn tur, Rs vbc hnih hi ṭum khatah pek zawh vek an ni dawn a, 2022-23 aṭanga 2025-26 chhunga an sum hmuh tur Rs vbc nga te chu kumtin instalment vawi hnih, Rs vbc 2.5 ve vea pekchhuah an ni ang.

"Covid-19 hri leng vang khan cabinet chuan 2020-21 leh 2021-22-a MPLAD Scheme chu hri leng dona atan hman alo rel tawh a ni. Parliamentarian zawng zawngte hian phur takin an pawisa dawn turte Covid dona atan an thawh a ni. Ram economy dinhmun siamṭhat dan turte thlirin MPLAD scheme hi 2021-22 kum hmabak la awm aṭanga kalpui leh ṭan turin rel a ni ta a ni," tiin Thakur chuan a sawi.

MPLAD Scheme hnuaiah hian MP-te'n an bial chhung, constituency-ah kumtin hmasawnna hna thawhna atan Rs vbc nga an hmang thei a ni.