December thlaah Russia President Putin a lo zin dawn

Russia president Vladimir Putin chu December 6-a India leh Russia-in annual summit an neih tur hmang turin India ramah a rawn zin dawn.

Vladimir Putin hi ni khat chauh chama rawn kal a tum a, prime minister Narendra Modi nena meeting an neihah hian ram pahnihte thawhdunna tur inremna eng emaw zat an ziah rin a ni.

Putin hian kumin chhunga ram danga a zinchhuah ṭum hnihna tur chauh niin, Geneva-a US president Joe Biden nen summit-level meeting an neih ṭum chiahin a la zin chhuak a ni. Italy-a tunhnaia G20 summit neih kha an rama Covid hri leng hluar chho leh avangin a hmuna tel loin, virtual hmangin a tel a ni.

Kum 2018 khan annual summit nei turin India ramah Putin hi a lo zin tawh a, hemi ṭum hian India-in Russia hnen aṭanga S400 air defence systems a leina tur contract pawh ziah a ni. Kum 2019 khan PM Modi chuan Russia khawchhak lam khawpui, Vladivostok tlawhin 5th Eastern Economic forum-ah Guest of Honour a ni. Nikum khan hri leng vangin annual summit hi an nei thei lo thung.