India-ah Covid-19 hri kai thar zat tlahniam zel

India ramah Covid-19 hri kai tharin tlakniam lam a pan zel a, Ningani khan hri kai thar 12,516 an awm a, a hma nia hri kai 13,091 aiin 4.3% in an tlem zawk a ni. Hetihlai hian ramchhungah hri kaihhnawih vanga thi 501 an awm leh bawk.

Hripui thihpui 501 zinga 419 te chu Kerala state-a mite an ni. Kerala-ah hian mi 47 te chu Covid kaihhnawih vanga thiah telh belh an ni leh avangin Ningani bika thi zat record hi an tam phah ta a ni. Hemi ni vek hian an state-ah hri kai thar 7,224 an awm.

Maharashtra-ah Ningani khan hri kai thar 997 an awm tih Union Health Ministry data chuan a tarlang. Hemi ni vek hian thihpui mi 28 awmin, dama chhuahtir 1,016 an awm a, damdawi-in aṭanga chhuahtir zat hi 64,64,948 an tling tawh a ni.

Delhi-a positivity rate chu 0.08% ni mekin, Ningani khan hri kai thar 40 an awm. Delhi-ah hian tun thla chhungin hri kaihhnawih vanga thi an la awm lo. October thla khan Covid-19 vanga thi mi pali leh September thlaah mi panga an awm.

India ramah coronavirus kai tawh zat aṭanga hri kai mek, active case chu 0.40% ni mekin, March 2020 hnua a tlakhniam ber ṭum a ni. Ramchhunga hri kai mek zat 1,37,416 chu ni 267 hnua a hniam ber ṭum a ni.

Nitina hri kai thar zat, daily positivity rate chu 1.07% a ni. Ni 39 chhung 2% hnuailamah a awm tawh bawk.

Hetihlai hian sorkar medical research agency leh Bharat Biotech siam coronavirus vaccine Covaxin chuan Covid-19 natna langchhuak, symptomatic lakah 77.8% in a veng thei tih The Lancet-in zirchianna a tihchhuahah a tarlang. Zirchianna hian hri inkaichhawn awlsam leh hlauhawm zawk Delta variant lakah 65.2% in a veng thei a, mahse hei aia zirchianna thuk zawk kalpui erawh a la ngai tih an sawi.

Covid-19 hri a inthlak danglam zel a nih chuan mipuite hian Covid booster dose an lak a ngai dawn tih Chairman leh Bharat Biotech Managing Director Dr Krishna Ella chuan Ningani khan a sawi.

Nimin zinga Health Ministry-in data a tichhuahah, Nationwide Vaccination Drive kalpuina hnuaiah ram pumah Covid vaccine dose vaibelchhe 110.79 semchhuah a ni tawh.

Kum hnih dawn liam taa China rama Covid-19 hri hmuhchhuah a nih aṭangin, khawvel ram hrang hrangah he hri vang hian mi maktaduai nga an thi tawh a ni.