Maha sorkarin Covid vaccine dose lak hun inkar titawi turin ngen

Maharashtra sorkar chuan November 30 ral hmaa state chhung mipui maktaduai 91.44 (100%) hnena Covid vaccine pek kim hman a tumna chu a hlawhtlin theihna atan, sorkar laipui hnenah Covid vaccine dose khatna leh dose hnihna lak hun inkar titawi turin a ngen.

State public health minister Rajesh Tope chuan virtual meeting neihah, union health minister Mansuk Mandiviya hnenah he ngenna hi siamin, vaccine lak inkar hi a tawi chuan vaccine semchhuah a chak phah thei dawn a ni, a ti.

State sorkarin vaccine semchhuah hna chak taka an kalpui dan chungchang sawipuiin, Tope hian November 30 ral hmain an state chhunga mi maktaduai 91.44 te hnenah dose khatna tal pek hman an tum tih a sawi.

Chief minister Uddhav Thackeray chuan tun thla tir lam khan state rorelna hmaah hmabak hautak tak chhawpchhuakin, Maharashtra mipuite chu November 30 hmain vaccine dose bikima an lak vek hman a duh thu a sawi. Mipuite chu vaccine dose kima la vek tura ngenin, state roreltute chuan Covid vaccine drive kalpui tumin, nikhat chhunga dose pe chhuak tam ber record siam an tum tih a sawi a ni.

"Covid kai thar tlahniam mah se hri leng a la reh loh avangin mipuite chu an fimkhur zel a ngai. Vaccine semchhuah kar lakah hian, mipuite hrilhriatnan awareness campaign-te kan kalpui tur a ni. State-ah hian movie theatre te hawn an ni tawh a, cinema theatre tinah vaccine lak pawimawh zia tihlan a ni tur a ni," tiin CM chuan a sawi.