New Delhi boruak bawlhhlawh vangin School leh sorkar office-te kar khat chhung khar dawn

India ram khawpui New Delhi-ah boruak bawlhhlawhin hlauhawm chhinchhiahna, "Severe" level a thlen tawh avangin khawpui chhunga school zawng zawngte chu kar khat chhung khar vek an ni dawn tih Delhi chief minister Arvind Kejriwal chuan a sawi.

Kar liam ta Inrinni khan CM Kejriwal hoin top offiical-te chuan emergency meeting an nei a,khawpui boruak bawlhhlawh zel avanga kar khat chhung atana school leh sorkar office-te khar hi an rel a ni. Vawiin aṭangin school-te hi khar an ni dawn a, sorkar office-a thawkte pawh in lam aṭangin kar khat chhung hna an thawk dawn a, private office-te pawh he dan hi zawm ve tura tih an ni bawk.

"Thawhṭanni aṭangin school te chu kar khat chhung khar an ni ang. Hemi hun chhung hian zirlai te chuan virtual class an kal dawn a ni. Heng inkaihhruaina te hi naupangte'n pawn boruak bawlhhlawh an hip luh lohna tura venna a ni," tiin Kejriwal chuan a sawi a, sorkar chuan Delhi-a boruak bawlhhlawh lamin hlauhawm chin a thlen tawh avangin he thutlukna hi siam an nih thu a sawi.

Kejriwal chuan "Delhi sorkar office zawng zawngte chu an mahni in aṭangin hna an thawk dawn a ni. Sorkar office te hi khar an ni dawn a, mahse chawlh a ni lo tih kan hriattir nawn leh a ni. Sorkar hnathawkte hi tunkar chhungin an chenna in aṭangin hna an thawk dawn a, Officer te hi emergency call dawng thei turin an inpeih reng tur a ni. Private office-te tan pawh in lam aṭanga hna an thawh theih nan kan dan siam zulzuiin inkaihhruaina tihchhuah a ni bawk ang," a ti.

School leh office-te khar a nih bakah, November 14-17 inkar chhungin khawpui chhunga in sak hna thawh khap a ni bawk tih CM chuan a sawi.

Boruak bawlhhlawh avanga lockdown puan a nih dawn leh dawn loh chungchang chu sorkarin a la ngaihtuah dawn tih Kejriwal chuan a sawi bawk.

Kejriwal sawidanin, New Delhi-a boruak bawlhhlawhte hian zual lam an pan zel a, an ṭhenawm state te'n ram an hal nasat vang a nih thu leh stakeholders-te chu thawkhoa boruak bawlhhlawh tiziaawm turin a sawm a ni.

CM chuan, "Data tarlan danin September 30 hma khan chuan Delhi khawpui hi a la bawlhhlawh lutuk loa, a bawlhhlawh lai ber pawn ngaihhnathiam theih chin, ‘satisfactory’ level-ah a la awm a ni. Hetih lai hian AQI chu 100 a ni a, mahse hemi hnu hian AQI hi a sang chho ṭan a ni. Heng a thlenna chhan hi chu state ṭhenawma loneituten loh theih loha an ram an hal a ngaih ṭhin vangin a ni. Mahse Delhi sorkar chuan he thil thleng chungchangah hian mi dangte mawhpuh kuala hun khawhral erawh kan tum lo," tiin tuna Delhi sorkarin a tum ber chu air emergency paltlang hi a ni,a ti.

Central Pollution Control Board (CPCB) chuan kar liamta Inrinni khan Delhi-a sorkar leh private office te chu an lirthei hman te 30%-a titlem tur leh, mipuite chu pawn lama chhuak tam lo turin a lo ngen tawh bawk.