Bawng ek leh zun hian ram economy ṭhannan a pui thei : MP CM Shivraj Chouhan

Madhya Pradesh chief minister Shivraj Singh Chouhan chuan bawng, bawng zun leh ekin mimal leh ramchhung khawsakna a chawikang thei tih a sawi.

Chief Minister Chouhan chuan Indian Veterinary Association-in convention of women veterinarians an buatsaihna 'Shakti 2021'-a thu a sawiah, sorkarin bawng humhalhna leh chenna hmun a siam a, mahse anmahni chauha an thawh theih loh tur thu leh khawtlang puihna an mamawh thu a sawi.

"Kan duh a nih chuan kan ram economy kan sawhnghet thei a, bawng, an zun leh ek kaltlang hian intodelh takin kan awm thei a ni," tiin CM Chauhan chuan a sawi.

"Thil tam tak hi bawng ek leh zun aṭanga siam an ni. Madhya Pradesh-a mitthi halna turin hmun ṭhenkhatah thing aiin bawng ek an hmang tawh a ni" a ti.

Ran doctor leh expert-te hian bawngvulhtute tan hlawk zawka an vulh theih dan turte ngaihtuah pui tura a duh thu a sawi bawk.

Union Minister for Fisheries, Animal Husbandry and Dairying Parshottam Rupala pawhin he hunah hian thu sawiin, Gujarat-a thingtlang hmun ṭhenkhata hmeichhe tam tak te chuan bawng vulh an uar chho a, hei hian bawnghnute lama sumdawnnaah hlawhtlinna lian tak a thlen chhoh mek thu a sawi.