CAA duh lohna lantir zel
Ram chhung leh rampawn hmun hrang hrangah Citizenship Amendment Act (CAA) duh lohna lantir chhunzawm zel a ni a, Kerala assembly phei chuan sorkar laipuia CAA paihna tur resolution a pawm hial. Hetih mek lai hian state hrang hrang Bharatiya Janata Party (BJP) leh union minister ṭhenkhat chuan CAA an thlawp thu hi an auchhuahpui ve reng bawk. Gujarat sorkar chuan CAA thlawpna resolution state assembly-ah putluh an tum thu an sawi ve bawk a ni.
Kerala assembly-in CAA duh lohna resolution pass
Kerala state assembly ṭhutkhawm Thawhlehnia neihah chief minister Pinarayi Vijayan chuan Citizenship Amendment Act (CAA) 2019 duh lohna resolution chu pulutin, member-te chuan an pawmpui a ni.
Thawhlehni khan Kerala one-day special session neih a ni a, he session-ah hian Schedule Caste (SC) leh Schedule Tribe (ST)-te reservation tih pun belhna tur thute rel a nih bakah, dan thar CAA hi sorkar laipui chu hnukkir tura ngenna tur resolution an pass.
He session-ah hian CM Vijayan chuan CAA-in India danpuia inziak secular (sakhau tihbik nei lo) a kalh thu leh sakhuanaa inthliar hranna a siam thu a sawi lang.
CAA duh lohna lantir ṭhenkhatte:
4 Puducherry chief minister V Narayanasamy chuan Assembly session neih leh hunah Kerala hnungzuiin CAA paihna tur resolution siam ve an tum thu Ningani khan a sawi. Political party zawng zawng aiawhte hemi chungchang hi sawipui thuai a tum thu sawiin, anti-CAA resolution assembly-a pawm ngei a nih theihna tura hmalak a tum.
4 Jamia Millia Islamia zirlaite leh artist ṭhenkhatte chuan University pawn kawngpuiah CAA leh NRC duh lohna thu leh milemte Ningani khan an ziak.
4 Netherland-a India mi awmte pawhin Thawhṭanni, Dec 30 khan a ṭum lina atan Hague-a Peace Palace kawtah CAA duh lohna an lantir leh. CAA duh lotute hian thuchhuah siamin mihring dikna chanvo palzut a nih thu an tarlang.
4 Kumthar niah pawh khan Shaheen Bagh-a thla chanve aia tam duh lohna lantute chu mi sang chuangin an zawm a, India Gate-ah pawh CAA duh lohna hi lantir a ni.
4 Kumthar niah vek khan Muslim organisation kaihhruaina hnuaiah Kochi-ah CAA duh lohna lantir a ni a, mi nuai chuang an tel a ni.