Full lockdown kalpui turin Delhi a inpeih

Supreme court-in khawpui boruakin ziaawm lam a pan theihnana hma la tura a ngen hnuah Delhi sorkar chuan full lockdown kalpui turin an inpeih tih court a hrilh.

Nimina Supreme Court-a hearing neih chhunzawmnaah, judge-te chuan Delhi khawpui boruak dinhmun chu dinhmun chhe takah a awm tih sawiin, rang taka hma lak a ṭul thu an sawi a ni.

Solicitor General Tushar Mehta chuan loneitute'n ram leh an thlai ro an hal khu chuan Delhi khawpui boruak chhiatna chu 10% vel chauhin a belhchhah tih court a hrilh bawk.

Chief minister Arvind Kejriwal-a kaihhruai sorkarin court-a affidavit a thehluhah, full lockdown kalpui turin an inpeih tih a sawi a, mahse he khuahkhirhna hi Delhi chhehvel, National Capital Region (NCR) huam chhungah kalpui vek a nih loh chuan awmzia a nei thui lutuk dawn lo tih a sawi nghal bawk a ni.

"Sorkar laipui emaw Commission for Air Quality Management-in National Capital Region pumah kalpui tura an tih chuan heng khuahkhirhnate hi kalpui turin kan inpeih reng a ni," tiin Delhi sorkar chuan a sawi. Delhi sorkar chuan boruak bawlhhlawh vang hian nimin aṭang khan kar khat chhung atan school leh sorkar office-te chu a khar tir a ni. Hei bakah hian ni thum chhung in sak a khap bawk.

Supreme Court chuan sorkar laipui hnenah vawiinah hian emergency meeting ko a, non-essential construction transport leh power plant tihtawp rih dante ngaihtuah turin a ti.