Sorkar laipuiin CBI leh ED hotu term pawhseina dan siam ; Eptu party-ten sorkar thiltih dan an sawisel nghal

BJP kaihhruai sorkar laipui chuan Central Bureau of Investigation (CBI) leh Enforcement Directorate (ED) hotu lute term, kum hnih china bithliah chu kum ngaah pawhsei theihna tur ordinance a duang. Hei hi eptu party-te chuan na taka sawisel nghalin, parliamentary democracy tihchhiathna a ni, an ti.

Pathianni khan sorkar laipui chuan agency pahnihte hotute term pawhsei chungchanga dan hman mek a siamṭhatna hi a pho chhuak a ni. He ordinance hi selection committee-in a pawm a nih chuan, agengy hotute term hi kum hnih a zawh hnuah, kum nga chhung chu kum khat zela pawhsei sak theih an ni dawn a ni.

CBI Director thlangtu committee-a tel, Congress MP Adhir Ranjan Chowdhury chuan he dan siam hian BJP sorkarin a thu thua engkim kalpui a tum dan chu a tichiang hle a ni, a ti. Hemi chungchangah hian midang tumah an rawn lo a, democray zahna pawh an nei tawh lo a ni tiin, House-ah member an ngah avangin an duh danin thil an kalpui zel tih a sawi. "Ordiange hi an siam ang a, a hnuah Parliament-ah an pass zui leh mai dawn a ni," a ti.

CPM general secretary Sitaram Yechury pawhin, Parliament session neih hmain, sorkar laipui chuan an dan siam hi party dangin an zirchian theih hmain ordinance tichhuakin, CBI leh ED director term pawhseina tur hi an siam tih sawiin, hetianga hmanhmawh taka an che mai hian a phenah thil tenawm tak a awm nia a lan thu a sawi bawk.

Trinamool Congress hruaitu Derek O'Brien pawhin sorkar laipui chuan zah lo takin democray an sawisa a ni, a ti. RJD hotu Major Kumar chuan sorkar thiltih dan chu mitinte ngaihven zui a ngai hle tih a sawi. Rajya Sabha-a TMC chief whip, Sukhendu Shekhar Roy chuan BJP kaihhruai sorkar laipui chu Parliament zahna nei lohah a puh bawk.

CPI general secretary D Raja pawhin, Parliament session ṭan a nih dawn hnaih tawhah sorkarin ordinance hmanhmawh taka a tichhuak mai chu a chhan zawtin, a phenah thil imphumru a awm em tih chu mi tam takah zawhna a awm nghal a ni, a ti.

BSP MP Kunwar Danish Ali chuan sorkar thiltih chu an pawm theih loh thu sawiin, CBI leh ED hotu an duh duha an thunun theihte term pawhsei a nih theihna tura an ruahman niin a puh.