President-in Bangladesh Victory Day lawmna hmanpui dawn

President Ram Nath Kovind chuan December 16 khian Bangladesh khawpui Dhaka-ah Victory Day lawmna hun a hmanpui dawn niin Bangladesh Foreign Minister chuan a sawi.

President Kovind hian Bangladesh President Abdul Hamid sawmna angin December 16-17 hian Bangladesh a tlawh dawn a,"India President 14-nain Bangladesh a rawn tlawh vawi khatna tur a ni," tiin foreign minister AK Abdul Momen chuan a sawi.Bangladesh leh India hian December 6-a Maitri Diwas hman tur denchhenin "Logo and Backdrop" designing competition an buatsaih mek bawk.

Bangladesh leh India hian thla leha event lian tham tak pahnih awm tur, December 6-ah Maitri Diwas leh December 16-ah Bangladesh Victory Day an hman tur pualin high-level intlawhtawn hi neih an tum a ni.

Bangladesh hian Sheikh Mujibur Rahman piancham, Mujib Borsho leh War of Liberation kum 50-na an lawm mek bakah, India nena an thawhdunna kum 50-na pawh an lawm bawk.

Kum 1971-a India-in Bangladesh ram a pawm ni, December 6 hi ram pahnihte hian Maitri Diwas (Friendship Day) atan an hmang zui bawk.

Prime minister Narendra Modi chuan March thla khan Bangladesh hi tlawhin, Bangladesh prime minister Sheikh Hasina nen an inhmu a, ram pahnihte thawhdunna tur hrang hrang bakah economy lama thawhdunna thuk zawk aneih theih dan turte an sawidun. Modi-a cham chhung hian inkalpawhna, sumdawnna, information technology leh sports lamah thawhdunna tur MoU panga an ziak a ni.