Covid-19 Hri kai hmuh chhuah thar sing chuang an awm

India ramah Covid-19 kai an pun belh zela, nimina Ministry of Health and Family Welfare report tihchhuahah chuan hripui kai hmuh chhuah thar 10,976 an awm a, a vawi khatna atan hri kai hmuh chhuah thar sing chuang an awm a ni. 

Rampumah hri kai mi 2,97,535 an awm tawh a, enkawl dam 1,47,195 awm tawhin hri kai mek 1,41,842 an awm. Coronavirus vanga thi mi 8,498 an awm tawh bawk.

Nimina MoHFW report tihchhuah hma darkar 24 chhungin mi 6,166 enkawl damin enkawl dam rate pawh a sang ve zel a, 49.47% a tling tawh. Hetihlai hian thihpui mi 396 an awm leh thung.

Indian Council of Medical Research (ICMR) chuan ni khatah sample 1,50,305 an test thei tawh tih an sawi a, nimin thleng khan ram pumah sample 52,13,140 an test tawh. ICMR pawmpui laboratory 877 a awm tawh a, heng zinga 637 hi sorkar laboratory niin private laboratory 240 a awm bawk.

Enkawl dam hi pung zel mah se thihpui pawh hi an pung ve zel a, nimin piah lamah khan mi 357-in an thihpui laiin nimin report-ah erawh thihpui 396 an awm a ni.