PM Modi-a'n Purvanchal Expressway hawng

Prime minister Narendra Modi chuan nimin khan Uttar Pradesh-a cheng vaibelchhe 22,500 senga siam, km 341-a thui Purvanchal Expressway a hawng.

PM Modi chuan kum thum kaltaa a siamna tur lungphum a lo phum tawh, Purvanchal Expressway chuan UP mipuite pumkhatna a siam dawn tih sawiin, mi rethei, middle class, loneitu leh sumdawngte chuan he kawngpui hi an chhawr ṭangkai dawn hle a ni, a ti. Kawngpui a hawn hma hian PM chuan Indian Air Force-ten emergency-a fighter plane-ten thlawhchhuah leh ṭumna atana an hman theih tur, kawngpuia km 3.2-a airstrip siama airshow an neih chu a enpui nghal a ni. Highway hawn thar hi 6-lane niin, 8-lane thlenga tihlen theih tur a ni.

Purvanchal Expressway hi Lucknow leh Ghazipur inkara siam niin, India rama expressway hman mek zinga thui ber, km 302-a thui Agra-Lucknow Expressway chu a rawn khum a ni. PM chuan Uttar Pradesh chief minister Yogi Aditiyanath leh a team te, UP state mipuite a lawmpui thu sawiin, Purvanchal Expressway chu UP tana inchhuanna tham a tling a ni, a ti.