Damdawi-in te ni tlak hnuah post-mortem tih phalsak

Sorkar laipui chuan Thawhṭanni khan damdawi-inte chu tlai ni tlak hnuah hmanraw kimchang tak hmangin post-mortem an tih phalsak an ni tawh dawn tih a sawi. Mahse hei hian tualthah, mahni intihlum, pawngsual, taksa ṭawih tawh leh pawikhawihna thiltih nia rinhlelhte a huam tel dawn lo a ni.

Union health minister Mansukh Mandaviya chuan, "British hnuaia kan kalphung chu tihtawp a ni ta. Post-mortem chu eng hunah pawh tih theih a ni tawh ang. Prime minister Narendra Modi-a'n inrelbawlna ṭha kalpui a duhna bawhzuiin, health ministry chuan hospital-te chu zan lama kalpuina tur hmanruate an neih ṭhat chuan tlai ni tlak hnuah pawh post-mortem an tih a phalsak ta a ni," a ti.

"Sorkar kalphung chungchangah mi tam tak hnen aṭanga sawiselna leh rawtna te kan dawn hnuah, post-mortem kalphung chu thlak danglam remtih a ni ta a, vawiin aṭangin tlai ni tlak hnuah post-mortem tih phalsak an ni tawh ang," tiin Thawhṭanni khan Union Minister chuan a sawi a ni.

He inkaihhruaina dan tharah hian taksa peng inpek, organ donation titute chu khawl an neih phawt chuan ni tlak hnua khaihlak awm loin post-mortem tihsaknaah, ngaih pawimawh hmasak an ni bawk ang.

Health ministry chuan zan lama post-mortem tih chungchanga hospital-in-charge-te chuan infrastructure rintlak leh hmaruate te a rintlak em tih an enfiah hmasa phawt tur a ni, a ti. Zan lama post-mortem te hi video recording an ti vek tur a ni tiin, hei hi rinhlelhna a awm loh nan leh dan hnuaiah dik taka tih a ni tih finfiahna atan an hmang tur a ni, a ti.

Hetih lai hian law and order kaihhnawih thil a nih loh chuan zan lamah post mortem tih phalna hian tualthah, mahni intihlum, pawngsual, taksa ṭawih tawh leh pawikhawihna thiltih nia rinhlelhte erawh a huam lo thung a ni.