Delhi-ah lockdown pawhsei tum lo

Delhi health minister Satyendar Jain chuan Delhi-ah lockdown pawhsei a nih dawn loh thu a sawi.

Social media lamah Delhi-ah June 15 aṭanga July 31 thleng lockdown pawhsei a nih thehdarh a ni a,  mahse  Jain chuan sorkarin thuchhuah engmah a siam loh thu leh lockdown pawhseina engmah a awm loh thu chanchinbu mite a hrilh a ni. 

Delhi-ah hian nimin khan darkar 24 liam ta chhungin Covid-19 vangin mi 65 an thi a, he hri vanga ni khat chhunga Delhi-a thi an tam ber ni a ni. Minute 25 dan zelah Delhi-ah hian hri kai mi pakhat  thi ziah anga chhut a ni. He hri vanga thi hi mi 1,085 an awm tawh a, enkawl dam tawh hi mi 12,731 awmin, hri kai mek mi 20,871 an awm bawk a ni.

 

July 31-ah chuan Delhi-a hri kai awm zat hian mi nuai 5 an pelh an rin thu Delhi sorkar chuan a tarlang. Delhi-a hri kai zawng zawng aṭanga chhutin he hri vanga thi hi 3% a tling pha a ni.