Australia-a Mahatma Gandhi lim suasam

India sorkarin Australia tana a pek, Mahatma Gandhi lim (statue) chu kar liamta Inrinni khan Melbourne-ah suasam a ni.

SBS News report tarlan danin, Australia prime minister Scott Morrison chuan kar liamta Zirtawpni khan Rowville-a Australian Indian Community Centre-ah Gandhi lim hi a tlangzarh a, he hunah hian Consul General of India Raj Kumar leh Australia ram hruaitute pawh an tel. Mahse milim hi hawn a nih tukah suasam zui a ni.

Scott Morrison chuan he thil thleng hi a dem thu sawiin, cultural monument beihna chu an en liam mai mai dawn lo tih a sawi.

"Heng chetdan chaltlai tak hi a mualphothlakin a zahthlak hle a ni. Pawikhawihtu hian Australia leh India inkara inṭhianṭhatna zahlohna nasa tak a lantir a, a zak hle tur a ni," tiin Australia PM chuan a sawi a ni.

Australia India Community Charitable Trust chair Vasan Srinivasan chuan thil tisualtute hian milim lu chu tan tumin an zai a ni, a ti. India mi nuai thum dawn awmna Victoria-ah hian heng thil rapthlak takte hi a thlen kan beisei phak lo a ni, tiin Srinivasan chuan a sawi.

Victoria Police-te chuan pawikhawihtute hian Zirtawpni leh Inrinni khan hmanrua hmangin milim lu chu tan an tum tih sawiin, Knox Crime Investigation Unit detective-ten chhuichianna an kalpui mek a, he thil thleng mita hmutute chu lo penchhuak a; an thil hmuhte chiang taka sawi turin an ngen a ni.

Kumin January thla khan United States-a Northern California-a Davis khuaah Mahatma Gandhi lim chu suasam a lo ni tawh bawk.