Punjab CM-in khauh zawka Lockdown kalpui a tum

Punjab chief minister Amarinder Singh chuan Covid-19 vanga lock­down kalpui chu, weekend leh public holiday-ah chuan khauh taka kalpui a nih tur thu a sawi.

CM Singh chuan Delhi aṭanga an state chhunga lut turte chu testing certificate an neih ngei ngei a ngaih tur thu leh uluk taka lo endik an nih tur thu a sawi bawk. Heng hmalaknate hi tualchhunga hri inkai­darhna a thlen lohna atana a tih a ni. March 3 khan Italy aṭanga lo hawin Punjab-ah hian Covid-19 hri kai tih hmuhchhuah a ni a, he hri vanga thi hi mi 59 an awm tawh a ni. 

Punjab-ah hian Thawhlehni khan hri kai thar mi 82 an awm a, ni 10 chhungin hri kai mi 500 aia tam an awm hman a, hei vang hian khauh zawka lockdown kalpui hi Punjab sorkar chuan a tum ta a ni. 

CM chuan state chhunga hri kaite enkawl­na kawngah inthliarna a awm tur a ni lo tiin, damdawiin hrang hranga khum ruak awm zatte pawh mipuite hmuh theih tura tarlan zel tur a ni, a ti. Private hospital-ten Covid-19 kaite an enkawlnaah sum tam tak an charge nia complaint awm pawh, CM chuan health department hnenah damdawi-in tinah CGHS rate hman vek a nih theihna tura khauh taka hma la turin a hriattir.