SC-in Delhi-a hri kai enkawl dan a sawisel, Centre leh state ṭhenkhat hriattirna a pe
Supreme Court chuan nimin khan Delhi-a Covid-19 kaite enkawl dan chu na takin a sawisel a, hri kaite hi ransa ai pawha enkawlna dawng ṭha lo zawkah a puh hial.
Delhi hospital-te chuan hri kai te chuan enkawlna an dawng ṭha lo hle a, dam lo na tak takte chu ngaihventu mumal nei loten an awm a ni, tiin Court chuan a sawi. Hri vanga thi ṭhenkhat chu an chhungte pawh hrilh hriat an ni lo tih a sawi bawk.
Damdawiinah khum awl tam tak a awm laiin, damlo te chu damdawiina in admit tumin an tlankual a, report ṭhenkhatin an tarlan danin sorkar damdawiin pakhatah lobby leh waiting area-ah awmtir an nih laiin a chhunga khum awl tam tak a awm thung si a ni, tiin Court chuan a sawi. Chennai leh Mumbai-ah ni khata test zat a pun chhoh laiin, Delhi sorkarin ni khatah test zat 7,000 aṭanga 5,000 a tihtlemna chhan a zawt bawk.
SC chuan sorkar laipui bakah Maharashtra, West Bengal leh Tamil Nadu sorkar pawh hri kaite enkawl dan a ṭha tawk lo nia sawiin hriattirna a pe bawk a ni.