Kejriwal-an PM Modi-a lehkha a thawn

Delhi Chief Minister Arvind Kejriwal-a chuan Prime Minister Narendra Modi-a hnenah lehkha thawnin, Delhi sorkar leh IAS officer te inkara inhriat thiam lohna awm mek chinfel a nih thei nana inrawlh turin a ngen.

Nimin khan CM Kejriwal-a chuan PM hi lehkha a thawn a, an buaina chinfel pui tura inrawlh tura a ngen bakah, Delhi khawpui boruak bawlhhhlawh zel chungchang ngaihtuaha review meeting nei thar leh turin a ngen bawk. Kejriwal chuan pollution review meeting hi sorkar officer-te an tel duh loh vangin thla thum chhung neih a ni tawh lo niin a sawi.

Kejriwal-a chuan, "Thla thum chhung Delhi-a IAS officer-te hi sorkar lakah an nuar tawh a ni. Minister-te meeting kohah an kal duh lo a, hei vang hian Delhi sorkar hnathawh pawh a nghawng phah hle a ni. Delhi IAS officer-te hi LG leh sorkar laipui thununna hnuaiah an awm a, an transfer, suspend leh thil dang pawh sorkar laipui leh LG kuta awm a nih avangin an nawrh titawp tur hian Delhi sorkar chuan hma ala thei lo a ni", a ti.

Delhi khawpui tan pollution chu harsatna lian tak, ngaihven ngai reng a ni tih Kejriwal chuan a sawi a, a hma chuan khawpui chhung boruak dinhmun ngaihtuahin ni 15 danah meeting neih ṭhin a nih thu a sawi. Mahse IAS officer-te nawrh vangin thla thum chhung meeting hi an nei thei tawh lo tih a sawi. An buaina chu LG chuan a chinfel sak thei a, mahse buaina chingfel tur hian a pui duh lo niin a sawi. Hei vang hian PM chu a inrawlh a ngai ta nia sawiin, a lakah Delhi mipuite pawhin beiseina an nei niin a lehkhaah hian a tarlang.