Rahul Gandhi party-ah eptu hruaitute kal ṭha

Congress party president Rahul Gandhi-an Nilaini zana Iftar party a buatsaihah central-a eptu party hrang hrang hruaitute an kal ṭha hle.

Rahul Gandhi-a Iftar party-ah hian JDS, CP-M, BSP, NCP, RJD, TMC, AIUDF, JMM leh DMK hruaitute an kal a, eptu party hrang hrang hruaitute hi May 23-a Karnataka-a Congress-JDS ṭangrual sorkar lakluh a nih khan an lo kal tawh bawk a ni.

Tun hnaia RSS inkhawm buatsaihah thu sawitu, president hlui Pranab Mukherjee pawh party-ah hian a tel. Rahul Gandhi hi CPI-M hruaitu Sitaram Yechury, BSP hruaitu SC Mishra, DMK hotu Kanimozhi, JMM hruaitu Hemant Soren leh TMC hotu Dinesh Trivedi te nen dawhkan pakhat an kilho a ni.

Congress party hian Sonia Gandhi-in party president a nih lai, kum 2015 khan Iftar party hi a lo buatsaih tawh a ni. Mahse Nilaini-a party buatsaihah Sonia hi a tel lo a, party hruaitu hlunte erawh an tel kim hle.

Eptu party te hian kum 2019-a Lok Sabha inthlanpui neih hunah BJP hneh ngei a nih theih nan thawhho dan tur an ngaihtuah mek a ni.