J&K-a beihpui thlak chawlh chungchang ngaihtuah

Union Home Ministry chuan Muslim ho thla serh, Ramzan thla chhunga Jammu and Kashmir-a firfiakte laka beihpui thlak chawlhsan tura sorkar laipuiin thutlukna a lo siam tawh chu nimin khan a ngaihtuah ṭha leh.

Home Ministy hian high-level meeting koin Union Home Minister Rajnath Singh-an a kaihruai a, MoS PMO Dr Jitendra Singh, MoS Home Hansraj Ahir, Director General of Paramilitary Forces, NSA Ajit Doval, IB Chief leh official dangte an tel a ni.

Meeting-ah hian J&K-a security dinhmunte thlir nawn leh niin, Amarnath Yatra atana inbuatsaih dante an thlir ho bawk.

BJP general secretary Ram Madhav chuan sorkar laipuiin inkahhai a lo puan tawh chu Home Ministry leh a buaipuitu department-ten an ngaihtuah nawn dawn tih a sawi a, hei bakah hian Ramzan thla a tawp hnuah hma lak chhunzawm zel dan tur pawh ngaihtuah a ni dawn bawk tih a sawi.

Madhav chuan sorkar laipuiin J&K-a beihpui thlak tihtawp lailawk a tumna chhan chu Ramzan thla hman anih dawn vanga boruak ṭha leh mipuite hmakhua a ngaih vang niin a sawi a, mahse he thutlukna hi inlakhran duhtu leh firfiakte chuan an zawm ṭha duh lo a ni, a ti. "Ramzan hi Muslim-te tana thla serh a ni a, hei vang hian sorkar laipui chuan beihpui thlak tihtawp lailawk hi a rel a ni. Sorkar hmalakna ang hi zawm ve turin firfiak leh inlakhran duhtute pawh kan beisei a, mahse an chetphungah engmah thlak danglam an tum lo a ni", a ti.

Sorkar laipui hian thla hmasa khan Ramzan thla chhungin security force-ten J&K-a firfiakte laka beihpui an thlak chu tihtawp a ni dawn tih a sawi a, mahse hemi rual hian beih an tawk a ni emaw, civil mite dinhmun a him tawk lo emaw nia an hriat chuan a ṭul anga an chet chhuah theih tur thu a sawi nghal bawk.

Hetih lai hian ramri, Line of Control (LoC)-ah chuan inkahhai thuthlung puan tawh chu bawhchhiat a la ni fo a, firfiakten security force leh civil mite an la bei reng tho a ni. Nilaini zing khan Samba-a Chambliyal sector-ah Pakistan sipaite silai hmehpuah avangin Border Security Force (BSF) sipai pali an thi a, mi dang pathumin hliam an tuar. Pulwama-a police station chu firfiakten Under Barrel Grenade Launcher (UBGL) hmangin an bei bawk a ni.