Karti Chidambaram-a firm thamna Rs vbch 1.16 dawngah puh

Enforcement Directorate (ED) chuan Nilaini-a Delhi court-a chargesheet a thehluhah, Aircel-Maxis thubuai chhui mekah union minister hlui, P Chidambaram-a fapa, Karti Chidambaram-a firm pahnih chuan thamna cheng vaibelchhe 1.16 an dawng niin a tarlang.

Aircel-Maxis thubuai chhui mekah hian CBI leh ED chuan P.Chidambaram hi thu an lo zawtfiah tawh bawk a, chargesheet-ah pawh ziahluh ni mah se, Congress hruaitu hi he thubuaia puh zingah hian a telh lo thung.

ED hian chargesheet hi Additional Sessions Judge Ruby Alka Gupta-a hnenah thehlutin, Karti leh he thubuai inhnamhnawiha puh dangte thu zawhfiah tura ko turin a ngen bawk.

Hetih lai hian P Chidambaram chuan ED-in Karti Chidambaram leh midangte a puhna chu a dik tawk lo tih a sawi a, mahse hemi chungchang hi court-ah thlen a nih tawh avangin vantlang hmaah chuan engmah a sawichhuah rih loh tur thu a sawi.