Journalist Shujaat Bukhari-a vui liam

Jammu and Kashmir-a veteran journalist, Ningani-a Sringar-a kahhlum Shujaat Bukhari chu nimin khan a khua, Kreeri-ah vui liam a ni.

Ruah sur nasa tak hnuaiah Bukhari vuinaah hian mi tam tak an kalkhawm a, an zingah hian J&K eptu hruaitu Omar Abdullah bakah PDP leh BJP minister-te pawh an tel.

The Rising Kashmir chanchinbu editor-in-chief, Shujaat Bukhari leh a personal security officer (PSO) pahnihte chu Ningani tlai khan Srinagar-a an office kawtah firfiakten an kaphlum a ni. Kum 62 mi, Bukhari hi city centre, Lal Chowk-a Press Colony-a a office kawtah mi tu tih hriat lohten an kaphlum a ni. Bukhari hi a office aṭang hian Iftar hmang turin a car-in a chhuak a, bike-a chuang mi pathumte chuan a motor-a chuang hi nasa takin an kap zui a ni.

Bukhari kaphlumtute hi hriatchian an ni lo a, CCTV footage-ah lang mah se helmet an khum bakah an hmai an khuh avangin hriat theih an la ni lo. Police-te chuan tualthattute hi zawn mek an nih thu an sawi. Hetih lai hian eng pawl mahin Bukhari thattu an nih thu hi an la sawi lo.

Shujaat Bukhari hi journalist huaisen tak niin, Kashmir Valley-a boruak ralmuang a awm duhtu niin, boruak ṭha a awm theihna tura conference hrang hrang buatsaih ṭhinah pawh mi ṭangkai tak a ni. A thih hma lawk hian a twitter-ah Jammu and Kahsmir leh Pakistan Occupied Kashmir-a mihring dikna chanvo palzut a nih chungchanga UN human rights chief-in India leh Pakistan a demna report link a dah a ni.

Bukhari thah a ni hi J&K hruaitute leh journalist-te chuan an dem thu an sawi. Jammu and Kashmir Chief Minister Mehbooba Mufti-i chuan firfiakte thiltih chu a dem thu sawiin, remna leh muanna a awm theihna atana an hmalakna dodaltute bei let tura an inlungrual a ngaih thu a sawi a, pawikhawihtute chungah chuan rorelna dik lantir a ni ngei ang, a ti. Union Home Minister Rajnath Singh pawhin mi dawihzepte thiltih a ni tiin, Bukhari thah a ni chu a dem thu a sawi.

Editors Guild of India chuan Bukhari thah a ni chu press freedom leh democratic voice beihna a nih thu an sawi a, Press Club of India pawhin pawikhawihna thleng hi an dem thu an sawi bawk.