WB-in fake news venna tur dan siam dawn

West Bengal sorkar chuan social media lama thu dik tawk lo, fake news thehdarh ṭhin venna turin dan siamthar a tum.

State Home Department chuan social media lama fake news leh thlalak siamchawp post darh hian hmun hrang hrangah harsatna leh buaina a chawk chhuak fo ṭhin niin a sawi a, hetiang thil thleng ṭhin veng tur hian sorkar chuan dan siam a tum niin a sawi. Khawtlang leh chi leh chi inkar harsatna leh buaina thlen thei fake news leh thlalak siamchawp thehdarh ṭhinte chu hremna pek ngei a tum a ni, a ti.

State official chuan fake news thehdarhte hi Indian Penal Code (IPC)-a section hrang hrang hnuaiah an thu thehdarh dan azirin thubuai siamsak theih an ni tih a sawi a, mahse state sorkar chuan hetiang thil titute hremna na zawk pek theihna tur hi siam a tum a ni, a ti.