Arvind Kejriwal-an nawrh huaihawt chhunzawm

Delhi Chief Minister Arvind Kejriwal leh a cabinet minister pathumte chuan nimin kha a ni nga-na atan Lt Governor Anil Baijal-a office-ah nawrh an huaihawt chhunzawm.

Kejriwal bakah a deputy chief minister Manish Sisodia, public works department minister Satyender Jain leh development minister Gopal Rai-te chuan LT Governor Baijal chu Delhi-a Indian Administrative Service (IAS) officer-ten Delhi sorkar laka nawrh an huaiawt tihtawp tir tura phutin Thawhṭanni aṭang khan LG office-ah hian sit-in protest an huaihawt a ni. LG-in IAS officer-te nawrh tihtawp tura thupek a tihchhuah hma chuan office hi chhuahsan an tum lo tih an sawi.

CM Kejriwal chuan IAS officer-ten Delhi-a AAP sorkar an thawhpui duh loh chungchangah inrawlh turin Prime Minister chu alo ngen tawh bawk. Nimin khan a twitter-ah PM chu IAS officer-te nawrh tihtawp tura ngen turin Delhi khawpuia cheng mi maktaduai 10-te lehkha ziak chu AAP chuan a lakhawm dawn tih a tarlang bawk.

Party dang hruaitute pawhin AAP hruaitute nawrh huaihawt hi an thlawp thu an sawi a, Uttar Pradesh CM hlui Akhilesh Yadav, actor-turned-politician Kamal Hassan leh Shatrughan Sinha, CPI leh CPI(M) party pawhin an thlawp thu an sawi ve leh. Hemi hma hian West Bengal chief minister leh Trinamool Congress hotu Mamata Banerjee, RJD MP Manoj Jha, Union Minister hlui Yaswant Sinha-te chuan Kejriwal-a thil nawr hi an thlawp thu an lo sawi tawh a ni.