AIIMS ICU-ah Vajpayee a la awm

Prime Minister hlui Atal Bihari Vajpayee chu New Delhi-a AIIMS ICU-ah dah chhunzawm a la ni a, a dinhmun hi ngun taka enfiah reng a ni thu hospital chuan a tarlang.

AIIMS Director Randeep Guleria chuan kum 93 mi, Vajpayee hian hma a sawn chho zel niin a sawi a, a enkawltu doctor-te pawhin ni rei lo te hnuah a ṭhat chhoh thuai an beisei tih a sawi.

Vajpayee hi June 11 khan a kidney infection vangin damdawi-inah hian dah luh a ni a, thawk lamah harsatna a neih bakah a zun kawng pawh a ṭha lo nia sawi a ni. Vajpayee hian zunthlum a nei bawk a, a kal pakhat zawk chauhin hna a thawk thei tawh a ni. Kum 2009 khan alo stroke tawh bawk.

Madhya Pradesh Chief Minister Shivraj Singh Chouhan, RSS general secretary Bhaiyyaji Joshi leh Rajasthan Chief Minister Vasundhara Raje-te chuan nimin khan Vajpayee hi an tlawh a, hemi hma hian Prime Minister Narendra Modi, BJP chief Amit Shah, RSS chief Mohan Bhagwat, prime minister hlui Manmohan Singh leh HD Deve Gowda, Congress president Rahul Gandhi-te pawhin an lo tlawh tawh bawk.

Vajpayee hi ṭum ṭhum prime minister atan hian thlan a ni tawh a, kum 1999-2004 khan a PM term hmang tluanin, Congress member ni lo zingah prime minister term hmang tluan thei awmchhun a la ni bawk.