Jammu & Kasmir-ah sipaiten beihpui thlak chhunzawm dawn

Ramzan thla puala Jammu and Kashmir-a firfiakte laka inkahhai puan chu pawhsei a ni dawn lo a, security force-ten beihpui an thlak chhunzawm leh nghal dawn niin Union Home Ministry chuan a sawi.

Sorkar laipui chuan Muslim te thla serh, Ramzan chhungin J&K-ah sipaiten beihpui an thlak dawn lo tih May 17 khan a lo puang tawh a ni. He inkahhai a puan hi zawm turin firfiakte leh inlakhran duhtute pawh a ngen bawk.

Nimin khan Home Minister Rajnath Singh chuan inkahhai puan hi pawhsei a nih dawn loh thu sawiin, sorkar chuan Jammu and Kashmir-a firfiaka chetna leh pawikhawihna thleng ṭhin titawp tura a beih chhunzawm tur thu a sawi.

Inkahhai puan chhung hian sipaite chu theihtawpin insum mah se, firfiakte hian pawikhawihna thlenin civil mite leh security force-te an bei chhunzawm reng a ni. Senior journalist Shujaat Bukhari pawh Srinagar-a a office kawtah firfiakten an kaphlum a ni.