DMK-in Delhi CM thlawp

Delhi Chief Minister Arvind Kejirwal leh a minister ṭhenkhat ten Delhi-a IAS officer nawrh huaihawtte tihtawp tir tura phuta, Lieutenant Governor Anil Baijal an nawrna leh, an buaina chhanah Prime Minister Narendra Modi leh BJP kaihhruai NDA sorkar a puh chu chu Tamil Nadu-a eptu pawl, DMK president MK Stalin chuan a thlawp thu a sawi.

Andhra Pradesh Chief Minister N Chandrababu Naidu, Kerala CM Pinarayi Vijayam, West Bengal CM Mamata Banerjee leh Karnataka CM Hd Kumaraswamy te pawhin AAP hruaitu an thlawp thu hi an lo sawi tawh bawk.

Stalin-a chuan a twitter-ah, mipuiten chief minister atana an thlan tling chunga sorkar laipui chet dan chu a dem thu sawiin, BJP chu India sorkar inrelbawl dan phung tichhiaah a puh. DMK president chuan,"Delhi LG-in zah lo taka mipui thlan lal, Chief Minister chunga a thiltih dan hi ka vei hle a ni. BJP hian he ram inrelbawl dan kalphung hi an tichhia a ni. State dikna vawnhim tuma beitu Chief Minister-te hi ka thlawp a ni", tiin a ziak.

Delhi CM Kejriwal chaun DMK hotu hi lawmthu a hrilh nghal a, Delhi mipuite a thlawpna a lantir avanga a chunga a lawm thu sawiin, BJP lamtangte chuan Delhi mipuite an hmusitna an lantir chhunzawm zel a, mahse hi an ngai zam mai mai dawn lo tih a sawi.

Naidu, Mamata, Kumaraswamy leh Vijayan-te chuan press conference a neihah, Prime Minister Modi-a kaihhruai NDA sorkar chu Delhi sorkar buaina chinfel sak thuai tura an phut thu an lo sawi tawh a ni. State pali CM-te hi Delhi CM hmu tur hian an kal a, mahse Delhi LG hian hmuh phalna a lo pe duh lo a, a hnuah LG hmuh an dil leh a, mahse hei pawh hi phalsak a ni leh lo niin an sawi.

Kejirwal leh a deputy CM Manish Sisodia bakah cabinet minister Satyendar Jain leh Gopal Rai-te chu kar kalta Thawhṭanni aṭang khan IAS officer nuarte tihtawp tir tura phutin LG office-ah hian nawrh an huaihawt a ni.