Boruak bawlhhlawh vangin Delhi-NCR-a zirna in khartir

Commission for Air Quality Management (CAQM) chuan boruak bawlhhlawh avangin Delhi khawpuiah chauh ni lo, National Capital Region (NCR) leh a chhehvel biala zirna in hrang hrangte khar turin Thawhlehni zan khan thupek a tichhuak. Hemi rual hian zirna inte chu online hmanga zirna kalpui chhunzawm turin a ti bawk.

Delhi sorkar chuan Delhi khawpui boruak bawlhhlawh vang hian khawpui chhung bikah chuan Thawhṭanni aṭang khan kar khat chhung atan zirna inte khar turin a lo ti tawh a ni.

CAQM chuan zirna in te khar a nih bakah, NCR huam chhungah November 21 thleng in sak hna thawh a khap bawk. Railways, Metro, Airport leh National Security/Defence kaihhnawih project ni lote chu chawl vek turin a ti.

November 21 thleng khawpui pawn aṭangin Delhi-ah truck an tlan luh khap a ni bawk a, essential commodity phurtu chauh luh phalsak an ni.

Commission chuan Delhi, Haryana, Rajasthan leh Uttar Pradesh sorkar leh private firm-te hnenah hnathawktute pawh 50% chin chu in lam aṭang thawh tir turin a ti bawk.

Thawhlehni khan Commisison hian Delhi bakah NCR state - Haryana, Uttar Pradesh leh Rajasthan sorkar official-te boruak bawlhhlawh zel chungchanga hma lak dan turte sawipuiin meeting a neihpui a ni.

NCR-ah hian diesel hmang motor kum 10 aia upa leh petrol hmang motor kum 15 aia upa tawh chu tlanchhuak tawh lo tura tih an ni bawk.

Delhi leh NCR state chief secretary-te chu he kaihhruaina siamte hi kenkawh a ni em tih enfiah fo tur leh, sawiselna a awm chuan commission-ah report thehlut tura hriattir an ni.