Mamata Banerjee-in Ration scheme thar tlangzarh

West Bengal chief minister Mamata Banerjee chuan Thawhlehni khan "DuareRation" kawtkaia ration semchhuahna (ration at doorstep) scheme a tlangzarh a, he scheme hi state chhunga mipui vaibelchhe 10 velin an chhawr thei dawn tih a sawi.

Mamata chuan a kaihhruai sorkarin ration dealer-ten commisison an dawn ṭhin pawh quintal khata Rs 75 ni ṭhin chu Rs 150-ah a tihpun sak dawn tih a sawi bawk.

"He Duare Ration scheme hi state chhunga mipui vbc 10-ten an chhawr thei dawn a ni. Kan hmalakna a hlawhtlin theihnan ration dealer-te puihna pawh ka dil nghal a ni. Tun aṭang chuan state mipui vaibelchhe 10 chuangte chuan hunbi nei thlapin thla tin an kawtkaiah ngei ration an dawng thei dawn a ni," a ti.

Dealer tinte hian ration an semchhuahnaah anmahni pui turin mi pahnih an ruat thei dawn a, "Heng mite hian hlawh atan thlatin Rs 10,000 an dawng ang. Sorkarin Rs 5,000 a tumsak anga a bak zawng chu dealer-in an tum ve thung ang. Dealer 21,000 hnen aṭangin hnathar 42,000 kan siam belh thei dawn a, state chhunga ṭhalaite pawhin he hamṭhatna hi an dawng thei dawn a ni," tiin Mamata chuan a sawi.

He scheme kalpuina atan hian sorkarin Rs vaibelchhe 160 a sen a ngaih tur thu CM chuan a sawi a, ration semchhuahna tur motor leina turin ration dealer 21,000 te cheng nuai khat ṭheuh pek an ni dawn a ni, a ti.

"In tina ration pek hi hna hautak tak niin ka hria. Bial khat sem turin kum khat tal a ngai a ni. Kawngpui pakhat hi hmun liah ṭhenin mipui hnenah ration sem hi an tum dawn a ni. Tualchhung mipuite hian he hmalakna hi kan kalpui hmain chiang takin an hriat a ngai bawk a ni," tiin CM chuan a sawi.

State-in ration dealer tam zawk an mamawh dawn bawk nia sawiin, Chief Minister chuan ration dealer ni tura dilna pawh cheng nuai khat aṭangin Rs 50,000-ah tihhniam a ni dawn a, mi tam zawkin an dil thei dawn a ni, a ti. "Ṭhalai tamzawkte pawhin an rawn dil thei a, hmeichhia te pawhin an dil thei ang," a ti.

Trinamool Congress hotu hian ration dealer-te chu an ruahmanna dodal lo turin a ngen zui bawk. Hetih lai hian dealer ṭhenkhat chuan he ruahmanna hi duh loin Calcutta High Court-ah lungawi lohna an thlen a, mahse court chuan an thu thlen hi a lo hnawlsak a ni.

Banerjee hian kumin March-April assembly inthlan hma khan "Duare Ration" scheme hi an kalpui dawn tih a lo puang tawh a ni.